O Obradoiro cumpre 42 anos no seu momento máis glorioso

Por Mirian Fernández (@mirianfdezv)

O 6 de outubro é unha data digna de ser sinalada no calendario de tódolos obradoiristas. Hoxe cúmprense 42 anos do nacemento oficial do clube e coincide cun dos momentos máis ilusionantes para a parroquia compostelana. Poucos clubes da Liga Endesa teñen unha historia con tantos altibaixos, capaz de sorprender a propios e estraños.

Multitudinario recibimento tralo primeiro ascenso do Obradoiro
(Foto: El Correo Gallego)

Aquel martes de outubro de 1970, os 29 socios fundadores reuníronse nun local da histórica Rúa do Villar coa intención de fundar un clube de baloncesto na cidade. Nace así o Obradoiro Clube de Amigos do Baloncesto. O novo equipo intégrase na Terceira División e tras unha década de loita nas categorías baixas consegue o ascenso á segunda categoría, denominada por aquel entonces Primera B.

A temporada 1981/82 será recordada por sempre como a do primeiro ascenso do Obradoiro á máxima categoría do baloncesto nacional. Convertiase pois no primeiro equipo compostelán en conseguir un ascenso á categoría máis alta dun deporte. Decenas de aficionados acudiron ao aeroporto de Lavacolla para recibir con vítores aos heroes desa gran xesta. Curiosamente, outro dos equipos que logrou ascender foi o Baskonia de Vitoria. Sen embargo, na tempada seguinte xurdiron numerosos problemas económicos e deportivos, o equipo só gañou dous partidos e finalmente descendeu. A este primeiro descenso sumaráselle outra perda máis de categoría en 1984.

Máis o capítulo máis famoso da historia do Obradoiro ten lugar na tempada 1989/90: o playoff de ascenso contra o Júver Murcia. O conxunto murciano logrou a vitoria pero o Obradoiro descubriu a alineación ilegal do xogador Esteban Pérez, que figuraba con pasaporte español aínda que en realidade era arxentino. Tras unha reclamación desestimada pola vía deportiva a protesta trasladouse aos tribunais, o que deu lugar a unha batalla que duraría nada máis e nada menos que 17 anos.Pola súa parte, o equipo encarrila sucesivos descensos de categoría e acuciado polas débedas está a piques de desaparecer. É entón cando unha xestora dirixida por José Ramón Mato e José Ángel Docobo se fai cargo do clube para evitalo seu final e continuar coa batalla xudicial. Precisamente hai seis días cumpríronse vinte anos desta proeza e foron moitos os que botaron en falta unha merecida homenaxe no pasado partido en Sar.

En novembro de 2007 o Tribunal Supremo dalle a razón por fin ao equipo compostelán. A ACB está obligada a readmitilo na máxima categoría do baloncesto español e o clube ten que pagar o canon correspondente á tempada 1990-1991. Comezaba así unha nova era para o Obradoiro.

A partir deste momento os capítulos son por todos coñecidos. A volta á máxima categoría non foi doada, a escaseza económica e a mala sorte cebouse co Obradoiro e finalmente consumouse o descenso. Sen embargo, será recordada como a tempada na que o soño se convertiu en realidade. Un equipo formado en apenas tres meses serviu para demostrar que en Compostela había moitas gañas de baloncesto de élite e un modesto clube que meses atrás atrás competía en EBA convertiuse nun fenómeno social en toda Galicia. Un novo obradoirismo estaba en marcha e con el unha afición que se convertiría fielmente no sexto home.

A platilla actual loitará por sumar outro célebre capítulo
(Foto: Fernando Blanco, El Correo Gallego)

Trala tristura do descenso chegou a éxtase polo ascenso e a consolidación en ACB a pasada tempada. Pero a historia tíñalle preparado un novo obstáculo ao Obradoiro. Estaba obligado a convertirse en Sociedade Anónima Deportiva cun capital social de máis de 3 millóns de euros. E o milagre volveuse obrar. O 31 de xullo deste ano o clube convértese por fin en SAD tralo gran esforzo de empresarios e seguidores que mercaron accións. Sorprendentemente, ningunha Institución Pública se involucrou coa causa. Pero, unha vez máis, volveuse demostrar que no Obra todo é posible.

Hoxe, 42 anos despois e ilusionados cunha nova plantilla que xa conseguiu a primeira vitoria, o Obradoiro pode presumir de seguir sendo o mesmo que os seus fundadores pretendían que fose, un humilde Clube de Amigos. Feliz cumpreanos.