"Unha Ollada Obraiada" por Erea Hierro

Foto: obradoirocab.com

Pegaba o sol con forza en Compostela a primeira hora da tarde do venres. Os obraiados, na nosa santa sede, preparábamonos  para viaxar a animar, como non, o seu querido Obradoiro.

Marchamos sen ter moi claro por onde quedaba o campo do COB, o noso presidente ao volante manexaba o cotarro e, aínda sen saber cómo, conseguimos dar co Paco Paz xusto a tempo para ver o quecemento do Obra.

O partido comezou cun Breogán moi serio. Desde o primeiro minuto demostraron que este ano aspiran a grandes obxectivos. O Blu:Sens Monbús desacertado viu como os de Lugo alonxábanse no resultado cada vez máis. Malia isto, os da capital non baixaron os brazos e multiplicando os esforzos conseguiron levarse o partido e pasar, por terceiro ano consecutivo, a unha final de Copa Galicia.

Do tema arbitral mellor non falar moito, porque se empezamos nin mil páxinas nos chegarían para comentar o que tal liaron nesa primeira semifinal.

O segundo partido da tarde enfrentaba o cadro local contra o Basket Coruña. Nese partido, o ex obradoirista  Alfonso Sánchez competía por primeira vez por un título logo dunha lesión que o tivera apartado das canchas preto de 600 días, de ahí que quedara patente que aínda lle queda algo de rodaxe para volver a ser o que era.

Finalmente o Clube Ourense Baloncesto levouse o partido, polo que, o Obradoiro xa tiña rival para a final do sábado.

O sábado volvíase a repetir a historia: 5 obraiados, un coche, un destino e un obxectivo… volver coa Copa Galicia para Santiago. A calor non sería excusa para animar ata fartar aos nosos xogadores.

Esta vez o partido foi máis relaxado, gañamos con soltura da man duns brillantes Oriol e Levon que xunto con Corbacho foron os máximos anotadores do Blu:Sens Monbús. Non podemos esquecernos de Pavel Pumpra que case sen tempo, aprendeuse os sistemas que lle mandaran por internet os adestradores para poder debutar co Obradoiro. O resultado foi do máis grato: o crack checo deixouse a pel en defensa e axudou ao equipo a conseguir a victoria. A afeción soubo recoñecerlle o esforzó e foi ovacionado cando Moncho o sentou.

O equipo en xeral loitou e peleou como se esperaba pero tamén é certo que moito deben mellorar as cousas para competir na dura Liga Endesa. Mais, con todo, estamos convencidos de que, da man do corpo técnico, este equipo será quen de loitar por cousas grandes esta tempada.

Os obraiados seguiremos ahí, animando ata o último suspiro, é o que ten isto do “Miudiño Connection”.

"Unha Ollada Obraiada" por EREA HIERRO